"АЛГАН ДЭЭРХ ШУВУУ" НИСЛЭЭ

Орчуулагч,яруу найрагч Ж.Оюунцэцэг  өөрийн болон орчуулсан шүлгүүдээ эмхэтгэн,Америкт шинэ ном гаргалаа. "АЛГАН ДЭЭР ШУВУУ"  нэртэй энэ номонд өөрийнх нь бичсэн ухаарал, гэгээрлийн,зөөлөн аяст шүлгүүд,олны хүртээл болсон дууны  шүлгүүд, мөн хүүхдэд зориулсан танин мэдэхүйн сайхан шүлгүүд оржээ.  Ном дөрвөн бүлэгтэй бөгөөд 3 ,4 -р бүлгийг нь Орос, Америкийн яруу найрагчдын бүтээлээс орчуулсан  яруу найраг бүрдүүлж байна. Оросын нэрт яруу найрагч Е.Евтушенкогийн  "Токиод орсон цас", Литвийн ардын яруу найрагч Кристианас Донелайтесийн "Хавар" зэрэг найраглал, Анна Ахматовагийн  "Чамтай цуг тамд очьё",
Марина Цветаевагийн "Эх орон",,"Танд би дурлаагүй минь аз" шүлгүүд,
Андрей Вознесенскийн  "Сая сая сарнай" дууны шүлэг, Америкийн Эдгар
Аллан По-гийн  "Аннабел Ли" дууль , Пол Маккартнийн  "Жүүд минь" гэдэг
дууны шүлэг, Томас Лаксийн "Хөршүүд",Линн Эмануэлийн "Сарнай", "Цоожны
нүхээр шагайхуйяа" зэргийн дэлхийн сонгодог сор болсон бүтээлүүд энэ
номонд орсон байна. 

 Номын хавтасны болон  зураг чимэглэлийг Монголын нэрт зураач,барималч, монголд цаасан барын урлагийг үндэслэгч С.Төрбурам хийжээ.  Орчуулагч Ж.Оюунцэцэг энэ номондоо зарим шүлэгийг орос монголтой нь, англи монголтой  нь хадаж,хоёр хэл дээр зэрэгцүүлэн тавьсан нь орчуулга сонирхогч зарим хүмүүст сонирхолтой,өгөөжтэй болсон байна.  Ж.Оюунцэцэгийн "АЛГАН ДЭЭРХ ШУВУУ" шурхийн нисэж уул ус, хил хязгаарыг даван  уншигч таны сэтгэл зүрхэнд хүрнэ гэдэгт гүнээ итгэж байна.

                                                        Ц.Түмэнбаяр.